فـــرنـــســــا ...

`°¨¨¨™?¦?™¨¨¨ بـــاريـــس ¨¨¨™?¦?™¨¨¨°

باريس عاصمة النور والجمال .. وهي احدى المدن الفرنسية الجميلة

يبدا الشانزليزيه بقوس النصر

ARC DE TRIOMPHE وارتفاعه ياصل الى 110 متر اذا طلعته

يعطيك بانورما على الشانزاليزيه ولا اروع منه

المحلات في هالشارع كثيره ومن اشهرها محل العطورات وادوات الزينة

سيفورا ..وهالمحل يعتبر اكبر محلات العطورات في باريس .. والله ياه

و ديره بعد!!!

SEPHORA
^^^

ومن المحلات الكبيرة في هالشارع محل اسمه فناك

FNAC والمحل هذا جنب السيفورا وهو في قلب الشانز اليزيه والمحل هذا

مشهور بالادوات الالكترونيه من كمبيوترات وجوالات وافلام فيديو

واغاني .. الخ

والمحل هذا يبيع شرائح جوال مدفوعه (سوا الفرنسيين) .. سعر الشريحه

حوالي 30 يورو .. ويطلبون منك احضار جواز سفرك عشان يعطونك

شريحه!!

وفيه من المحلات الكبيره فيرجن المختص بافلام الفيديو والقيم والاغاني ..

والمحل هذا يتفوق على فناك في مجال الافلام والاغاني .

وفيه محل ديزني لملابس والعاب الاطفال .. ولوي فيتون LOUIS

VUITTON وهذا من اغلى محلات الجلديات .. وتلقى اليابانيين صافين

سرا عليه .. وبصراحة بضايعه حلوه مره

.
وشارل جوردان للاحذيه والجاكيتات .. ومحل قاب للملابس.. والمحلات

كثيره لو اعددها كلها ماخلصت

بعض شركات السيارات الكبيره لها صالات عرض خياليه في الشانز اليزيه .. ومنها معرض للمرسيدس موجود فيها موديلات خياليه .. ومعرض لتويوتا .. ومعرض رينو اللي جلست اسعبل عند الموديلات اللي حاطينها .. لانها شي مايخش المزاج .. سيارات غريبه من جد

وفيه صالتين سينما لعرض اخر الافلام الامريكيه .. بس انتبه للفلم .. ترا فيه

عرض باللغة الفرنسيه وفيه عرض باللغة الانجليزيه وتقدر تسال اللي يبيع

عند الشباك وش اللغة في الفلم اللي راح تحضره او تشوفها على اللوحة

الاماميه لاوقات الافلام

سوبرماركت كبيره اسمها مونوبغي

Monoprix شعارهم .. كلش في الثلاجة!!!

نجي لاماكن التبطح واللي اذبح السعوديين عندها .. المقاهي والمطاعم

طبعاً اشهر مقهى هو الفوكيت

Fouquets... مافيه احد راح فرنسا ولاجلس فيه ..وافلقوني اذا فيه احد يدري انه مسمى نسبة الى مؤسسه لويس فوكيه ..

خيالي .. صاير في الزاويه بين الشانز اليزيه وشارع جورج الخامس ..

قبل ماتجلس في الفوكيت نصيحتي لك ادخل كشك الجرايد اللي قدامه

واشترى الجرايد العربيه مثل الشرق الاوسط او الحياة وسو نفسك مثقف

قدام اللي رايح واللي جاي قدام الفوكيت فيه كرسي عام دايم يجلس عليه واحد متشرد انيق يلبس دايم جاكيت فرو ومثقف في نفس الوقت تلقاه يقرا جرايد .

. بس نصيحة للبنات اذا مروا من عنده يحاولون يسرعون لانه مهبول .. اي بنت تمر قدامه يفاجأها بكاميرته ويصورها .. بس تراه حبيب ولاتستغرب

اذا جاك وانت جالس وفتح باكت الدخان (عادي لاتستغرب ) .. والفوكيت يقفل الساعة 2 في

الليل .. وهو من المقاهي الغالية .. سعر الكابتشينو فيه يوصل الى 8 او 9

يورو والمويه 10 يورو!! (الله لايغير علينا بوفيهات الصناعيه والعصارات )

ومن المقاهي المعروفه هناك قهوة باريس Cafe De Paris وهالقهوة اكثر اللي يجونها اجانب وهي جنب الفوكيت ... ويجي بعدها قهوة لو دوفيل Le Deville .. هذا المقهى اللي قابلنا فيه سامي ::1t:: هالقهوة ماتسكر الا الساعة 2 في الليل .. تلقى غالبية اللي جالسين فيها حاجزين طاولاتهم من بدري (السعوديين بس!! ) .. مع العلم ان فيه قهاوي افضل منها بكثير .. بس هالعالم تعودوا .. من بعد الساعة 10 في الليل يجي مهرج جزائري بشنطته ويجلس يستهبل على اللي رايح واللي جاي (والله ياهو ابلش اليابانيين ) ولكنه مايتعرض للسعوديين (بلاه التصطير اللي جاه من ثلاث سنوات ) وبعد مايخلص استهباله يلم قاسمة الله من اللي جالسين

ويجي بعد الدوفيل .. قهوة رينو Renault وهالمقهى راقي وهادئ في

نفس الوقت .. وصاير داخل معرض رينو للسيارات.. جنبها على طول

هاجن داز Häagen-Dazs سلملي على وهالمكان معروف عند كثير من

الناس ببيع الايس كريم .. والجلسة في هالمكان تحلو في اخر العصر .. لدرجة انك بتلقى عليه سرا ناس يبون يجلسون فيه .. وفي هالفترة يجي نفس ا

لمهرج الجزائري المذكور اعلاه
وفي الجهة المقابله من الهاجن داز تجي قهوة الماريوت (انواع التسدح انا بها القهوه)Marriottوهالقهوة في نظري انا من احلى القهاوي .. والسبب ان اللي يخدمون فيها نفسياتهم حلوه غير اللي في القهاوي الثانية وكمان علشان ساكن بنفس الفندق ..وهي تقفل الساعة 12 في الليل ... وتجي بعدها بمسافه قهوة اسمها مدريجال Le Madrigal هذا احلى وقت لها اول العصر .. برضه الجزائري المذكور اعلاه يجي فيها هالحزه ( وهنا انجلد )
طبعاً المقاهي كثيره بس اللي ذكرته هنا اشهرها

بالنسبة للمطاعم عد واغلط .. منها الفوكيت اللي تكلمنا عنه قبل شوي يوجد في داخله مطعم فخم لكن اكله بصراحه مهوب الى هناك ... وفيه بعد مطعم ماسيون دي السياس MAISON D'ALSACE وهالمطعم من احلى المطاعم اللي تقدم المأكولات البحرية وبصراحه كل ما مريت من عنده لقيته فاتح مابعد شفته مقفل ابد بتلقى ناس كثير طالبين طبق مكون من ثلاثة ادوار ماكولات بحريه اشكال والوان ولكن مشكلتها انها نيه .. يعني لاتغلط وتطلبها والا بتبلش فيه مثل بعض الناس .. الله يديم النعمه .. الطعم رايح فيها لدرجة ان الطرار انحاش يوم عطيته قطعه من اللي فيه ... وفيه مطعم بيتزا بينو Pizza Pinoوهو تقريباً اشهر مطعم في الشانز اليزيه تلقى ربعنا مسنترين فيه من بعد الساعه 2 في الليل .. وقدامه مطعم بيتزا روما Pizza Rome وتقريباً نفس الاكل اللي عند بيتزا بينو.. عموماً غالبية المطاعم بالنسبة للمشروبات تلقاها ماتقدم الا اورنجينا والا كوكا كولا او كوكا لايت .. لاتبلشهم عندكم ببسي والا ميرندا والا مدري ايش ... في الجهة الثانية من الشارع يوجد مطعم بلانيت هوليوود Planet Holywood والمطعم هذا ما اتوقع فيه احد مايعرفه .. لايفوتكم الفاهيتا عندهم تراه خطييييير ...

مطاعم الوجبات السريعه المشهوره في الشارع هم ماكدونالدز McDonald's ومطعم كويك Quek .. هذولا اللي اتذكرهم .. الباقي ناسي اسماءها او بالاصح مافيه امل اتذكرها

نجي للفنادق .. طبعاً مافيه احد مايعرف فندق الماريوت Marriott.. وهالفندق صاير في قلب الشارع ولاعليه كلام ... جنبه شقق فندقيه اسمها كلاريدج Claridge حلوه بس مشكلتها انها شوي قديمه .. لو سكنت فيها وصادف ان الجو حار تقدر تطلب مكيف للغرفه .. لانها تجي بدون مكيفات .. ولهواة الطبخ اطلبوا مواعين ولاتستحون .. خلوهم يجيبون المعاميل كلها وترا عندهم زمزميات للقهوة والشاهي ... وهالثنين هم الوحيدين اللي في الشانز اليزيه .. لكن فيه حولهم فنادق كثيره منها : كاليفورنيا ، كلاريدج بولمان ، تشاتو فرونتناك ، ورويك ، وكونكورد لافاييت .. وهالاخير هو ابعدهم .. بينه وبين الشانز من 10 دقايق الى ربع ساعه مشي ... وغيرها كثير

الصرافين الموجودين في هالشارع بتلقاهم منتشرين في كل جهه .. طبعاً يبيلك تشوف من احسن واحد فيهم سعر .. هالكلام في حالة انك جاي للبلد مامعك يورو .. وانا اشوف ان افضل اثنين هم اللي موجود المجمع التجاري اللي فيه فناك FNAC والثاني في المجمع التجاري اللي فيه بلانيت هوليوود .. والاخير يبيع بطاقات مكالمات دوليه ... وبالنسبة لبطاقات اعادة التعبئه للجوال تلقاها عند فناك FNAC او عند اي محل يبيع دخان TABAC

قبل انهي كلامي عن هالشارع الكبير ابغى اذكركم بنقطه .. انتبهوا من النصابين اللي يجون يقولون حنا جايعين وحنا جايين من قريح وما معنا فلوس وحنا وحنا .. ترى هالاشكال ماوراها الا المشاكل يعني لاتعطونهم وجه ابد ... وبتلقون الطراريين البوسنيين .. والله ياهم علل!! ويجونك بالاسلام ان حنا مسلمين ومدري ايش وهم الله اعلم .. حريمهم تلقاهم يدخنون في وحده من اللفات
<<<<< كافشهم
فيه بزر عله ... والله لو تعطيه مال قارون لازم يسوي حركات نص كم عليك اذا ابعد عنك .. وتلقاه من بكره جاي يشحذ منك ولا كأن شي صار
خلصنا من الشانز اليزيه ومافيه من محلات ومقاهي ومطاعم ونجي للشوارع الثانية المشهوره في باريس

شارع جورج الخامس او افنيو جورج اسانك Av. George V
وياتي في قلب هذا الشارع الفندق العالمي الشهير فندق جورج الخامس Four Seasons Hotel George V واللي تعود ملكيته للامير الوليد بن طلال وهو من اغلى الفنادق في باريس وافخمها ... وجنبه فندق برنس دو قول Prince De Galles ... ويوجد في راس الشارع شقق الكاريدور وهي قريبه مره من الفوكيت ...وقدامها محل يبيع ايس كريم خطييييييييييييير الظاهر ان اسمه بارادايس Paradise اذا ماني غلطان .. لايفوتكم الايس كريم عندهم ..مكتب الخطوط السعوديه في نفس الشارع ورقمهم مميز 0105006565.. وفي الشارع نفسه مطعم عربي اسمه وبقاله عربيه اسمهم الديوان .. اذا حنيتوا للاكل العربي مهوب يخالف تجون تاكلون فيه .. والمطعم صاير في الدور الثاني ويجي فيه غناء في الليل بس احيانا يبيلك تحجز قبل تجي .. وترا مافيه خربطه يعني مناسب للعوائل.. بس مشكلتهم اذا شافوك خليجي محطوك بفاتورة مهيب صاحيه .. يدخلون فيها طلبات ماطلبتها .. عشان كذا يبيلك تدقق في الفاتورة قبل تحاسبهم هذا ... في الدور الارضي من المطعم فيه اكلات عربيه على السريع .. مثل شاورما وفلافل وكبه وانت ماشي .. وفيه بقاله عربيه ...ومن المطاعم العربيه الثانيه مطعم نورا .. ومكانه في خلف فندق جورج الخامس وله فروع ثانيه في باريس ...وفي شارع جورج الخامس مطعم حلو وفخم اسمه فندي FINDI وعلى ما اعتقد انه مايفتح الا في المساء ..في الشارع محل كبير لجورجيو ارماني .. وبوتيك فريه FERRE وفيه محلين حلاقه في نفس الشارع ( رجالي ونسائي ) ممتازين بس الله ياخذهم غالين .. حلاقة الذقن بس بـ 40 يورو والشعر بـ 60 يورو

في نهاية الشارع يجي شارع من العيار الثقيل اسمه افنيو مونتين Avenue Montaigne وهالشارع عليه افخم المحلات في العالم مثل شانيل، وهاري وينستون ، وروبرتو كافالي، ولوي فيتون ( بعض الناس يسمونه لويس فويتن ) وغيرها الكثير من المحلات الفخمة ... ويتربع في وسط الشارع فندق بلازا اثينيه Plaza Athenee وهو من الفنادق الفخمة في باريس ( يعني اذا جلست في الفندق كنك راكب بنتلي )

يسلموووا عالطررح الطيب

مـــــشـــكـــوره علة الرد الطيب

شكرا على لموضوع الحلوو

مشكور خيو على المرور الاحلى

شكرااااااااااا على الموضوع